අනිත් බොලෙයින් කෙල්ල | The Other Boleyn Girl

සුද්දාගේ රටේ ඒ කියන්නේ එංගලන්තේ එක්දාස් පන්සිය ගණංවල වෙච්ච සිදුවීමක් ගැන තියෙන ෆිල්ම් එකක් තමා The Other Boleyn Girl ෆිල්ම් එක. 2008 අවුරුද්දේදී තමා තිරගත උනේ. අටවෙනි හෙන්රි රාජෝත්තමයාණන් වහන්සේත් උන්දෑගේ ගෑණු පරාණත් නිසා ඒ දවස්වල ඒ රටේ රජමාළිගේ වෙච්ච ඕපදූප සීන් ටිකක් සහ ඒ සිදුවීම් නිසා රටේ අනාගතේ වෙනස් වෙච්ච හැටි ගැන යම් විස්තරයක් දෙනවා ෆිල්ම් එකෙන්. පැය එකයි විනාඩි 55ක් තිස්සේ යන ෆිල්ම් එක තනි වාක්‍යයකට ගත්තොත් දැනෙන අදහස තමයි ඒ කිව්වේ...
කළිංම කිව්වත් වගේ මේක ඉතිහාස කතාවක් පදනම් කරගෙන හදපු ෆිල්ම් එකක්. ෆිල්ම් එකට කළිං 2001 අවුරුද්දේදි මේ නමින්ම පොතකුත් නිකුත් වෙලා තියෙනවා. ලියලා තියෙන්නේ පිලිප් ග්‍රෙගරි (Philippa Gregory) කියලා රචිකාවියක්. පොත අනුසාරයෙන් තමයි ෆිල්ම් එක හදලා තියෙන්නේ. ෆිල්ම් එක බැලුවට මම පොතනං කියෝලා නැහැ.
දැං ෆිල්ම් එක ගැන පොඩ්ඩක් කතා කරමු. කතාවේ හැටියට අටවෙනි හෙන්රි රාජෝත්තමයන් වහන්සේට පිරිමි ළමයි නැහැ. ඒ බිසවුන්නාන්සේට පිරිමි ළමයෙක් ලබාදීමේ නොහැකියාවක් තිබිලා තියෙනවා. ඉතිං මේ හේතුව නිසා රජතුමාගේ පවුල් සංස්ථාවට අප්සට් කාලයක් උදාවෙලා තිබ්බේ. ඉතිං රජ්ජුරුවන්ගේ හිත සනසලා අග බිසවුන්නාන්සේගෙන් බැරිනං වෙන බිසවුන්නාන්සේ කෙනෙක්ගෙන් හරි රජ්ජුරුවන්ට පිරිමි පුතෙක් ලබා දෙන වැඩේට බහින්නේ නෝෆෝක් ආදිපාදතුමා. ආදිපාදවරු කියන්නේ එංගලන්ත රාජසභාවේ ඇමතිතුමාලාට. මේ ඇමතිතුමාගේ නංගී බැඳලා ඉන්නේ බොලෙයින් පවුලෙන්. ඉතිං රජ්ජුරුවන්ට පුතෙක් දෙන්න එහෙම නිකං බැහැ. ඉස්සෙල්ලාම රජ්ජුරුවන්ගේ හිත දිනා ගන්න ඕනේ. ඊට පස්සේ තමා ඉතුරු ටික. මේ බොලෙයින් පවුලේ ඉන්නවා අක්කලා නංගිලා දෙන්නෙක්. ගෙදර අය අර ඇමතිතුමා එක්ක ප්ලෑන් එක ගහන්නේ අක්කව රජ්ජුරුවන්ට සෙට් කරන්න. නමුත් අක්කගේ කට කැඩිච්ච කතා සහ රට පණ්ඩිතකම් රජ්ජුරුවන්ට දිරවන්නේ නැති නිසා රජ්ජුරුවෝ කැමති වෙන්නේ නංගිට. ඒ වෙනකොට නංගි බැඳලා. නමුත් ඉතිං මොනා කරන්නද? රජ්ජුරුවන්ගේ කැමැත්ත තමා අවසාන කැමැත්ත. ඒක නිසා නංගිගේ මනුස්සයා සීන් එකෙන් කැපිලා යනවා. රජ්ජුරුවෝ නංගිට කැමති වෙච්ච නිසා අක්කා සහ නංගී අතරත් පොඩි පොඩි වලි යනවා. ඉරිසියාව තමා ඉතිං. කොහොම හරි  රජ්ජුරුවෝ මුළු බොලෙයින් පවුලම ගෙන්න ගන්නවා රජ මාළිගාවට. කාලේ ගතවෙද්දී රජ්ජුරුවොයි නංගියි ගොඩක් ළං වෙනවා. ඔය අතරේ අක්කව ප්‍රංශෙට යවනවා ප්‍රංශ රජතුමාගේ බිසවුන්නාන්සේගේ කාර්ය මණ්ඩලයට. කොහොමින් කොහොමින් හරි අක්කා ආයෙත් එංගලන්තෙට ඇවිත් රජ්ජුරුවන්ගේ හිත දිනාගෙන රජ්ජුරුවන්ව අල්ලේ නටවනවා. අවසානයේ අක්කා එංගලන්තේ අග බිසවුන්නාන්සේ වෙනවා. ඒ වෙනුවෙන් අටවෙනි හෙන්රි රාජෝත්තමයාණන් වහන්සේ රෝමානු කතෝලික පල්ලියෙන් ඉවත් වෙනවා. ඒක ගොඩක් විශාල දේශපාලනික සහ ආගමික තීන්දුවක්. කාන්තාවක් නිසා අටවෙනි හෙන්රි ඒ තීරණේ ගන්නවා. අග බිසවුන්නාන්සේ වෙච්ච බොලෙයින් අක්කට හැමදාම එහෙම ඉන්න පුළුවං වෙයිද? රජ්ජුරුවන්ටයි රටටයි අවශ්‍ය රජ කිරුළේ ඊළඟ හිමිකාරයා වෙන පුත්කුමාරයෙක්ව ලබාදෙන්න බොලෙයින් අක්කට පුළුවං වෙයිද? නැත්තං මේ පිස්සුව පස්සේ දුවලා මුළු පවුලම විනාස වෙලා යාවිද? පැයයි විනාඩි 55න් මේ ප්‍රශ්න ඔක්කෝටම උත්තර දැනගන්න පුළුවං...
මේ ෆිල්ම් එක නිකංම නිකං ෆිල්ම් එකක් නොවෙන්නේ ඇයි? බලපු මට අනුව මේක සෑහෙන්න දේශපාලනික ෆිල්ම් එකක්. බලය වෙනුවෙන් මිනිස්සු තිරිසන්නු උනත් වෙන්න පසුබට වෙන්නේ නැහැ කියන දේ පැහැදිලිවම පෙන්නන්න අධ්‍යක්ෂකතුමා සමත්වෙලා තියෙනවා. ඒ වගේම කොච්චර උඩ අතු අල්ලගත්තත් එක ක්ෂණිකව බිමටම වැටෙන්න පුළුවනි සහ එහෙම බිමට වැටිලා විනාශ වෙච්ච මිනිස්සු ඉතිහාසේ පුරාම ජීවත් උනා කියලා දැනගන්න හොඳ ෆිල්ම් එකක් මේක. හැමදේම වෙන්නේ මිනිස්සුන්ට. ඒක බොහොම ලස්සනට පෙන්නුම් කරනවා මේකෙදි.

හරි. දැං බලමු විවේචන. මේක ඉතිහාස කතාවක් (ක්‍රි.ව එක්දාස් පන්සිය ගණංවලදී වෙච්ච) නිසා ඉතිහාස කතාවකට තියෙන විවේචනේ කොහොමත් තියෙනවා. කට්ටියක් කියනවා මේක තමා ඇත්තම ඇත්ත කියලා. තව කට්ටියක් කියනවා අහවල් අහවල් තැන් වෙනස් වෙන්න ඕනේ කියලා. ඔය කාරණාව නිසා එංගලන්ත ඉතිහාසේ මේකයි කියන අවසාන තීරණේ ගන්න මේ ෆිල්ම් එක රෙෆරන්ස් කරගන්න එපා. ඊට අමතරව ගත්තොත් රජ්ජුරුවන්ගේ රාජතේජස නං බොහොම මදි. එරික් බානා (Eric Bana) හොඳ නළුවෙක් උනත් මේ ෆිල්ම් එකේදි රජ චරිතෙට කරපු සාධාරණේ මදි කියන එකයි මට දැනෙන්නේ. හැබැයි ඔහුව මේ චරිතේ සඳහාම Australian Film Institute සංවිධානය කරන AFI International Award සිනමා සම්මාන උළෙලේ හොඳම නළුවාට නිර්දේශ උනා. Eric Bana ඕස්ට්‍රේලියන් ජාතික නළුවෙක්. ඉතිං ඒ හින්දා වෙන්න ඇති මේ හොලිවුඩ් නිර්මාණය වෙනුවෙන් ඔහුව නිර්දේශ උනේ. මංදා... මම කිව්වේ මට දැනුන දේ.

ෆිල්ම් එකේ ඇට් කරන අය ගත්තොත්, Eric Bana හෙන්රි රජ්ජුරුවන්ට රඟපානවා. මීට කළිං බලපු ඔහු රඟපාන Black Hawk Down, Troy වගේ ෆිල්ම් වලදි දැක්ක රංගන පෞර්ෂය මේකෙදී නම් දැක්කේ නැහැ. මට නං ඒ මදි. ඊට අමතරව නතාලි පෝර්ට්මන් (Natalie Portman) බොලෙයින් අක්කටත්, ස්කාර්ලට් ජොහැන්සන් (Scarlett Johansson) බොලෙයින් නංගිටත් රඟපානවා. ඔවුන් දෙන්නම හොඳ සාධාරණයක් ඉටු කරනවා තමන්ගේ චරිතෙට. විශේෂයෙන් නතාලි පෝර්ට්මන්, බොහොම දක්ෂ විදියට සාමාන්‍ය කෙල්ලෙක් විදියට ඉඳලා අග බිසව බවට පත්වෙද්දි වෙන වෙනස්වීම් රඟපානවා. ඒක නියමයි.


ඊටත් අමතරව, ෆිල්ම් එකේ වර්ණ එහෙම බොහොම ලස්සනට ගලපලා තියෙනවා. අපි එංගලන්ත රජ කතාවල දකින අඩ අඳුරු රෙට්‍රෝ පෙනුම (මේකට කියන හරි නම මම දන්නේ නැහැ) එහෙම ඇහැට හරි සනීපයි. බලාගෙන ඉන්න පුළුවනි. සංගීතේ එහෙමත් කියන්න මෙහෙමයි කියලා ලොකු වැරැද්දක් නැහැ. ඒ වගේම ඒ එක්දාස් පන්සිය ගණංවල එංගලන්තේ සමාජයේ බාහිර පෙනුම පෙන්නන්න සෑහෙන්න මහන්සියක් වෙලා තියෙනවා. ඒක සාර්ථකයි.

හරි එහෙනං...
මෙන්න ට්‍රේලර් එක...
මෙන්න IMDB විස්තරේ...

මෙන්න ටොරන්ට් ලිංක්...
මේ KAT ලිංක් එක
මේ පයිරේට් බේ ලිංක් එක
මේ YIFY ලිංක් එක

පවුලේ සැමට සුදුසුයි...
නමුත් කතාව තේරුම් ගැනීමට හැකිවන්නේ 15+ අයට බව,
මගේ විශ්වාසයයි...
අයියෝ ඩේටා නෙමේ...